外母借錢買樓 女婿可以點？
休閒消費
發布時間： 2016/05/12 12:57
最後更新： 2016/08/02 17:03
▲ 相片來源：iStock
處境題：外母買咗層樓，但計錯數發現仲差100萬，打算問你借（假設你有咁多錢），他日層樓賣到好價錢自會還錢。如果你唔借，佢就要蝕50萬或者賤賣其他資產填數。好啦，聽完後，你決定借唔借？
我走去問男友，佢第一個反應係：
佢咪好着數！贏就佢執，輸就我啃。
但佢係你外母喎！
……
上述處境，查實係討論區一名樓主遇到嘅難題。話說佢外母最近買咗某500萬新盤投資，借完一按後尚欠200萬，左摷右摷後仲爭100萬。樓主提議外母做二按，但對方話做唔到喎。
點解借唔到二按？佢無講得好清楚，但估計係外母過唔到壓力測試。所以有人提議佢幫外母做擔保，咁咪借到囉！理性上，的確可以咁處理；人情上，外母知你有錢都唔肯借，之後實有排煩。
老實講，家陣咁嘅市況買樓花，分分鐘收樓時帳面已蝕100萬，與其係咁，會唔會依家蝕50萬走人着數啲？但外母點會理呢啲？佢只會睇到你借定唔借。所以樓主亦謂：
依家睇我要筆錢定同外母交惡。
點先可以保住筆錢，又唔使擘面？有位仁兄叫樓主私下約外母飲茶，首先話問咗銀行可以幫手做擔保（表現helpful），其後藉詞話瞞住老婆買股票坐艇，依家放要輸幾十萬（咁就封咗借錢後門），叫外母唔好同個女講。咁講又處理得幾圓滑噃！又學到嘢。
全文刊於《晴報》，標題經TOPick 編輯修改，原題為「外母借錢買樓 女婿借定唔借？」
《晴報》facebook
撰文 : Denise 晴報
